Nýtt slagorð bókasafna kynnt á Degi bókarinnar
Á Degi bókarinnar þann 23. apríl var kynnt nýtt slagorð fyrir bókasöfn við hátíðlega athöfn í Öskju, náttúrufræðihúsi Háskóla Íslands.
Kynningarnefnd bókasafna efndi fyrir stuttu til verðlaunsamkeppni um slagorð. Tæplega 1040 tillögur bárust nefndinni og aðstoðuðu fagaðilar frá auglýsingastofunni Athygli við valið á besta slagorðinu. Slagorðið sem varð fyrir valinu er “bókasöfnin – heilsulind hugans”. Sveinn Þorgeirsson, nemi í íþróttafræði í Háskólanum í Reykjavík sendi inn þessa tillögu og tók á móti viðurkenningu og 100.000 króna verðlaunum úr hendi Sigrúnar Klöru Hannesdóttur, formanns Upplýsingar, félags bókasafns- og upplýsingafræða. Áslaug Óttarsdóttir, formaður Samtaka forstöðumanna almenningsbókasafna afhjúpaði slagorðið með aðstoð Barböru Guðnadóttur, formanns nefndarinnar. Barbara gat þess í ræðu sinni að slagorðið væri að sumu leiti hugsað sem ákveðið mótvægi við þá miklu áherslu sem lögð er á líkamsrækt og -heilsu. “Það er alltaf verið að hvetja fólk til að gera átak í hreyfingu og líkamsrækt sem er mjög gott, en einnig er nauðsynlegt að rækta hugann. Með slagorðinu er bent á bókasöfnin sem heilsulind hugans þar sem notendur safnanna geta haldið huganum í góðu formi”. Með þetta slagorð í farteskinu undirbýr nefndin kynningarátak fyrir öll bókasöfn landsins þar sem leitast verður við að kynna hlutverk bókasafna eins og það er í dag og þá fjölbreyttu þjónustu sem þar er veitt.

Verðlaunsamkeppni um slagorð fyrir bókasöfn
Kynningarnefnd bókasafna efnir til samkeppni um slagorð til að nota í kynningarátaki fyrir bókasöfn.
Slagorðið þarf að eiga við allar tegundir bókasafna, hvort sem um er að ræða almenningsbókasöfn, skólabókasöfn eða sérfræðisöfn. Því er ætlað að koma jákvæðum skilaboðum á framfæri um bókasöfn og þarf að vera stutt, grípandi og gott að muna.
Frestur til að skila inn hugmyndum er til 20. mars 2008. Kynningarnefndin mun velja besta slagorðið og áskilur sér rétt til að nota það að vild. Upplýsing, félag bókasafns- og upplýsingafræða veitir 100.000 króna verðlaun fyrir besta slagorðið. Verðlaunin verða veitt á degi bókarinnar, þann 23. apríl.
Sendið hugmyndir í tölvupósti á bokasafn[hjá]bokasafn.is, eða merkt "verðlaunasamkeppni"á:
Bæjarbókasafn Ölfuss
Hafnarbergi 1
815 Þorlákshöfn

Athugið að senda með upplýsingar um fullt nafn, símanúmer og heimilisfang.
Með von um frjóar og góðar hugmyndir,
Kynningarnefnd bókasafna:
Barbara Guðnadóttir, Bæjarbókasafni Ölfuss
Hólmkell Hreinsson, Amtsbókasafninu á Akureyri
Hrafnhildur Þorgeirsdóttir, Upplýsingadeild Orkustofnunar
Kristín Ósk Hlynsdóttir, Safndeild Ríkisútvarpsins
Marta Hildur Richter, Bókasafni Mosfellsbæjar
Þóra Gylfadóttir, Bókasafns- og upplýsingaþjónustu Háskólans í Reykjavík

Kynningarnefndin fær lénið bokasafn.is
Vefurinn hefur verið í eigu Bæjarbókasafns Ölfuss, en safnið hefur afhent kynningarnefnd bókasafna lénið til afnota. Fyrst um sinn mun lénið nýtast í starfi kynningarnefndar til að miðla upplýsingum um starf nefndarinnar. Þeir sem vilja komast inn á vef Bæjarbókasafns Ölfuss fari inn á vefinn www.olfus.is

Efnt til skoðanakönnunar
Kynninganefnd efndi til skoðanakönnunar meðal starfsfólks bókasafna. Margir tóku þátt og komu með góðar hugmyndir. Allar hugmyndir og tillögur verða skoðaðar.
Bestu þakkir fyrir þátttökuna!

Kynningarnefnd skipuð
Haustið 2007 skipuðu Upplýsing, félag bókasafns- og upplýsingafræða og SFA, Samtök forstöðumanna almenningsbókasafna sameiginlega kynningarnefnd fyrir íslensk bókasöfn. Markmiðið er að móta kynningarátak meðal bókasafna, hvort sem um er að ræða almenningsbókasöfn, skólasöfn, háskólasöfn eða sérfræðisöfn.